Kabataan sa Bag – ong Panahon

Handum sang tanan

maayong pangabuhian.

Amo ang rason sang eskwelahan

Pero bal - an nga ang iban

Chicks kag allowance ang ginakabudlayan.

Ikaw, ako, mga kabataan.

Pareho’ng salaguron sang mga ginikanan.

Apang bal – an ang rason sa suportang padayon

‘gud mag – angkon kita

bwasdamlag nga matahum.

Apang aton dumdumon

ang kagarot sang panahon.

Damu krimen kay lapnagon ang kaimulon.

Sa lugar kun diin kaw halin

Piho, damu ang obra.

Apang hambal sang gobyerno

‘di bale kay indi lang man kita

Ang Amerika gani tumba ang ekonomiya

Damu nadulaan obra, kag pagsalig sa sistema.

Daku ang epekto sa aton ekonomiya

May pila ka bangko ang nadisgrasya

Ang mercado nadula kumpiyansa

Sigurado’ng paskwa sang iban, mala – mala!

‘Di mapaktan ang saka sang krudo

ini nagadikta sa presyo sang produkto

Hambal ni nanay,sang una nga panahon

Ang lima ka pisos manggad run

Apang subong, isa ka Tide sachet ang pwede baklon.

Indi maayo ang sitwasyon

Apang kita maswerte gihapon

Padayon nga nagatuon

para lab – uton ang mga handum

Apang nagabatyag bala kita?

Ang iba sa aton nag – untat tuon

kay pegado gid ang ila sitwasyon?

Ang iba sa aton,

nag – untat tuon kay gin – una tumba amu ang botelya

Kita’ng kabataan dire sa eskwelahan

nahangpan bala naton ang mga ginakanan?

Ang iba nagahilibion

sa tagsa ka pagbayad sang aton nga tuition.

Daku ang hangkat sa aton ikasarang

Damu ang nagahulat sa aton paghulag

Ang tanan nagabantay sa aton himuon

Bilang pagsabat sa hangkat sang panahon.

Damu sang palaligban tanda sang kagamu

ginamo para sa dason nga eleksyon

Si BF ang nagakanta sa telebisyon

ang iban nga kasumpong sagi itsa isyu sang korupsyon.

Kun eleksyon ang paagi sa pagbaylo sang sitwasyon

Pa’no lang abi ini?

Nagadula sang aton paglaum

para sa mas masanag nga palaabuton.

Kay sin – o kita magasalig?

Kay sin – o kita magasandig?

Kay sin – o kita magaampo?

Agud nga ang sitwasyon sa gihapon, mangin matinlo?

Ang sabat yara sa aton mga kabataan

Gani ang ila bwasdamlag aton amligan.

Sa pagkilala sa mensahe sang aton baganihan

Nga ang kabataan ang paglaum sang tanan.

Padayunon ta ang pagsalig sa mga kabataan.

Padayunon ta ang pagsalig sa ila ikasarang.

Giyahan, buligan para magsanyug ang ila nabal – an

Una nga tikang sa pagpakusog sa aton kabataan.

Wala sang iban nga maamlig sa amun, kundi kamu!

Updi kami sa pagtukod sang mapag – on nga balay.

Updi kami sa pagpanday sang mapag – on nga pamilya.

Updi kami sa pagpatindog sang mapag – on nga banwa.

Gamay malang kami nga gintugyanan,

gani indi namon ya pag - uyangan.

Gamay malang kami nga ginasaligan,

kay tungod labaw kami sa kadam – an.

Mga kabataan, indi ta paggub – on ang pagsalig sa aton.

Batunon ta ang hangkat nila.

Pakipagbatuan ang mga upang.

Kay kita ang bag – ong kabataan.

Tanan kita ululupod sa isa ka kausa.

Tanan kita magatibyog sa isang handum.

Isa lang para sa pagsanyog.

Gani ang isa labaw sa duha… husto!